يا قاسي يا ظالم يا هاجر كفاك*

*يا قاسي يا ظالم يا هاجر كفاك*

بقلم الشاعرة / ريم صالح

يا قاسي يا ظالم يا هاجر كفاك
فاكرني هقولك غلبني هواك ؟
عشان ما بحبك وبطلب رضاك
بتبعد وتقسي وتفرض جفاك
أشرق تغرب وتطلع سماك
أواعدك في طوبة وتيجي في كياك
أواعدك وتخلف وتعمل تقيل
ودايما هاجرني صباحك مساك
أقولك بحبك تقول مستحيل
فاكرني هقولك غلبني هواك
تشرق تغرب هجرب معاك
وتبعد تقرب هجيلك حداك
تحاور تناور وتعلن عداك
وتعمل جناية وفاكرك ملاك
وتيجي في مرة وتقتل قتيل
واخضع واجيلك أقولك فداك
* يا قاسي يا ظالم يا هاجر كفاك”
بقولك يا ظالم متبقاش سئيل
أنا مش خصمك وواكل غداك
بتيجي تصالح تحط الفتيل
وتمشي وقلبي يولع وراك
ماهي النظرة منك بتشفي العليل
وقلبي اللي دايما بيرفض شفاك
وسايبه لوحده في ليلك زليل
بيعطي وعمره ما شايف عطاك
بخطي في دربك ما الاقي دليل
وانت تعاكس وتخلف خطاك
* ياقاسي يا ظالم يا هاجر كفاك *
ياقاسي في جرحك وبفرح لفرحك
وبتهد صرحك في ساعة لؤاك
يعاني لهيبك ويرضي بعذابك
تطول غيابك توسع مداك
في حقه يسامح ويدي ملامح
وانت يا جارح تزود قساك
وقلبي يشوفك ويقرأ حروفك
وتنكر ظروفك وحقك معاك
وزايد وفايض ونفسي اقايض
ماهو انت اللي صايد قلبي بشباك
*ياقاسي ياظالم ياهاجر كفاك*