ولسه بحلم

بقلم على الحزين

 لسه بحلم ابني بيت صَغيِر
وازرع قدامه شجرة توت
وشجرة ورد , وشجرة محبه
واغني للأحبة , وللناس الشقيانين
السمر الطيبين , ولآدكِ يا غالية
وارسم الأمل في عيون ولادي
و في بكرة اللي جاي من بعيد ينادي
مه أنا لسه برضك بحبكِ
برغم قسوتك عليَّ بحبكِ
وبرغم كل شيء فيكِ بحبكِ
غصب عني مش بخطري
مش أنتِ برضك أمي حببتي
وبيني وبينك حبل سري
ودمك هو دمي , ولونك هو لوني
مش أنا لسه برضك حبيبكِ
ولدكِ , سندكِ , عكازكِ
ومن غير ما تناديه تلقيه واقف قدامكِ ,
خدامك , وملك أديك , ولا شيء يغلي عليكِ
تطلبي يا غالية منه عنيه يديك , وبروحه يفديكِ
وإن بكيتي يمسح بالحب دموع عنيكِ ,
وان شكيتِ ما ينام الليل , يفضل جنبكِ يواسيكِ
ولا أنت خلاص , نسيتي حبيبك
وان نسيتني أنا عمري ما هنساكِِ
يا ساكنه القلب من جوه , روحي في داكِ
ولو محيتي اسمي من سجلاتك
أنا لسه برضك بحبكِ
ولسه بحلم أشوفك يا غالية بتوبك
الأبيض , والورد مالي اديك
والواد الحليوه حبيبك
لابس ابيض في ابيض , فوق حصانه الأبيض
يخدكِ علي حصانه , يخدكِ في أحضانه
ويطير بيكِ كما الرهوان
وحبايبكِ حواليكِ يزفوكِ , يهنوكِ , يباركوكِ ,
وأنا واقف أغنيلكِ , قصائد حب ما اوفيكِ
وأبوس على راسكِ , وأبوس علي ايدكِ
وأبوس علي جبينكِ
وفي عنيكِ الحلوة أقول كام غنوه
وأحس إني أنا طير في السما حر
أنا طير في السما حر