وادي الحياه المؤلمه لشاعر محمد على

بقلم الشاعر/ محمد على

وادي الحياه المؤلمه
بتمد يوم في خريف بيوت مِتهدِّمَه
واحلام تِطير ويّا الهَوا
خَطوات ورا ومِتقدَّمِة
بتحكي ع العمر اللي راح
سنوات جِراح
وكمان مشاعر مُصدِمَه
والناس كتير وياك ومش وياك
ودايرة من وراك
تخون صحبة وجودك
ولو سابوك
أو ريَّحُوك
كلمات كتير مِتلَجِّمَه
لكن خلاص
كل الحياه وقفت في حَلق الأمُنيات
كما وضع الثَّبات
وكتير حاجات
تبدأ كما الحكايات بتحكي ع النصيب
تنده على تُوهة غريب
لو حَس بيها
يلتقيها كأنها جواه
وعُمره يِنشِرح
يِفرح ويِهنَى بالفرح
ويحس إنه مَغنَمَه

كل الدقايق واقفة ساعة إنتباه
زَي الحَرَس
مليون جَرس
وأدان بِيدَن في السما لكنّما
قلبي اللي مستني الصلاه
بِيسبّح المولى ف عُلاه
مع إن بَابك ياكريم عمره ما يوم انقفل
ومقام حبيبك قُبتُه تسحر عيون الناظرين
قلبي في أنين
لكن صلاتي عليك بتشرح دِنيتي
أرفع إيديّا بمطلبي
وانت النَبي
باتمنى تشفع يوم زحامنا ع الصراط
تاخد بايد متألمه
قلبي وانا
حاسين بقربك جوه فجر النور
تنوّر دَربنا
وطول عُمرنا
مالناش صِحاب
إنت اللي واقف جوّه قلب الوقت تحكي على الحقيقة وع السراب
مليون كتاب مفتوح وصفحة مضلمه