دايرة الحياة

بقلم : يسرى أحمد عباس
بمزاجك أو من غير ما تقصد بتقسّم الناس دواير وإنت مركزالدواير دي، يعني إيه؟ يعني إنت بتشوف نفسك في مركز علاقاتك باللي حواليك والناس اللي تعرفهم كلهم سواء أفراد عيلتك، أصدقاء طفولة وعشرة عمر، صحاب عاديين أو زمايل شغل وجيران وكل منهم ليه مكان ما حواليك.
.
فاكر رسمة الذرة بتاعة المدرسه وحواليها مدارات الإليكترونات؟ أهو إنت مكان الذرة ومعارفك في مدارات حواليك، وإنت بتعاملك معاهم بتحدد مكانهم فين في دوايرك من الأقرب ليك فالأبعد فالأبعد وبالعقل كدة الأبعد دا بيبقى الأسهل إنك تتخلى عنه ويطير بعيد في حين الأقرب أصعب عشان قوة الجذب بينكوا أقوى.
.
مش شرط دا عشان قريبك يبقى فالدايرة الأقرب أو عشان دا زميلك فالشغل يبقى أبعد، هي كلها كيميا وأسلوب تفكير وراحة نفسية بتكون عملية توافق وقبول والله.. اللي بتحس معاه بتجانس ويبقى في قبول بتسحبه ليك فالدايرة الأقرب والعكس صحيح، الدايرة الأقرب دايمًا فيها أقل عدد ممكن من الناس بس بيبقوا هم اللي ممكن يعملّوا أي حاجة عشانك وكل ما تبعد كل ما الدواير ترابطها بيضعف وبيبقى التخلّي عنهم أسهل.لما تلاقي برود في التعامل وعدم اهتمام و.. و.. الخ
.
سيب دايرة واحدة بس فاضية، الدايرة اللي إنت واقف فيها .. دي مش هيدخلها غير اللي هتكمل معاه حياتك .. ونقّي باقي الناس اللي تسحبهم لدايرتك القريبة اللي بعديها، حتى لو هيبقى فيها واحد أو إتنين بس يبقوا هم اللي يحافظوا عالدايرة دي، باقي الناس خليهم فالدواير التانية عادي واللي مش فارقين أوي خلّيهم في الأطراف عشان تتجنب المشاكل ومع الوقت والإحتكاك بالناس أماكنهم هتتغير فالدواير ايوا ايوا الكلام ده بجد مع الايام في ناس بتنزل حتي لو عشره طويله مهو انت مينفعش تشوف نفسك رخيص يعني وبنفس الفكرة مكانك بيتغيّر في دوايرهم بناءً عاللي بيتّم بينكوا وعالعقد الصامت اللي بيحدد بنوده تعاملكوا مع بعض ومتنساش إن القرب بيجيب مسؤلية وتعلّق وإلتزامات لو مش قدّها بلاش.
فعشان مترجعش تندم على راحة البال اللي ضاعت أو عالمشاكل اللي كترت وتقول أصل مفيش صاحب بيتصاحب، إفرز صحابك .. رتّب دوايرك .. حدّد علاقاتك.
.
إفرز صحابك .. رتّب دوايرك .. حدّد علاقاتك.